Félag íslenskra félagsliða

Föstudagur 27. janúar 2012

Námskeið í febrúar.

Starfsendurhæfing, atvinna með stuðningi

Markmið
• Að þátttakendur fái yfirsýn yfir ríkjandi þjónustukerfi í atvinnumálum fatlaðra.
• Að nemendur þekki hvernig sótt er um dagþjónustu/atvinnu með stuðningi.
• Að nemendur þekki hvaða þjónustu er boðið upp á í einstökum þáttum sértækrar þjónustu í atvinnumálum fatlaðra
• Að nemendur þekki til ýmissa úrræða, til að mynda atvinnu með stuðningi hjá Vinnumálastofnun og starfsemi Virk starfsendurhæfingarsjóðs

Námslýsing:
Hlutverk Vinnumálastofnunar kynnt og áherslur í vinnumálum einstaklinga með fötlun skoðaðar. Umfjöllun um Atvinnu með stuðningi sem Vinnumálastofnun heldur utan um. Ráðgjafi frá Virk starfsendurhæfingarsjóði kynnir starfsemi sjóðsins og fjallar um tilgang starfsendurhæfingar og kynnir þau úrræði sem í boði eru fyrir skjólstæðinga sjóðsins.
Fjallað verður um úrræði sem í boði eru og má þar meðal annars nefna dagvist, hæfingu, verndaða vinnustaði og atvinnu með stuðningi.

Umsjón með námskeiðinu hefur Salóme Anna Þórisdóttir, ráðgjafi hjá Virk starfsendurhæfingar-sjóði og ráðgjafi frá AMS – Atvinna með stuðningi hjá Vinnumálastofnunar á höfuðborgarsvæðinu.

Námskeiðið verður haldið tvisvar í Reykjavík hjá Framvegis, Skeifunni 11 b,

það fyrra 14. feb. kl. 17-20 og seinna námskeiðið er 15. feb. kl. 17-20.

Fjarfundur:

14. feb. Ísafjörður, Akureyri, Húsavík og Sauðárkrókur.

15. feb. Selfoss, Höfn í Hornafirði, Reykjanesbær, Egilsstaðir og Borgarnes.

Fjarfundarsendingar eru háðar því að næg þátttaka náist á námskeiðin.

Nauðsynlegt er að skrá sig á fræðslufundina.

Öll námskeið eru án endurgjalds fyrir félagsliða, óháð í hvaða stéttarfélagi þeir eru.

Öll skráning á námskeið fer fram rafrænt á vefsíðu Starfsmenntar www.smennt.is

en velkomið er að hafa samband við starfskonur Starfsmenntar í síma 550-0060 eða smennt@smennt.is ef þörf er á aðstoð eða nánari upplýsingum um námskeiðin

Mánudagur 23. janúar 2012

Atvinna í boði.

Óska eftir aðstoðarfólki – félagsliðum.

Ég er ung fötluð kona í Hafnarfirði sem leitar eftir ungu fólki (20-30 ára) til að aðstoða mig í daglegu lífi og auka lífsgæði mín. Um er að ræða fjölbreytt og lifandi starf um kvöld og/eða helgar sem felst í því að vera mér innan handar um það sem ég þarfnast aðstoðar við, s.s. að elda mat og sinna tómstundum. Mikilvægt er að viðkomandi beri virðingu fyrir því að ég vilji hafa stjórn á eigin lífi og sé tilbúinn að vinna með mér njóta lífsins á mínum eigin forsendum. Umsóknir, ásamt upplýsingum um menntun, fyrri störf og meðmælendur berist á netfangið jennyaxels@mac.com, sími 565-0945, 820-9100.

Óska eftir persónulegum forstöðumanni

Ég er ung fötluð kona í Hafnarfirði sem leita eftir einstaklingi í 50-100% vinnu til að halda utan um notendastýrða persónulega aðstoð í samvinnu við mig og foreldra mína. Viðkomandi þarf að hafa reynslu og menntun sem getur nýst í starfi og búa yfir viðhorfi sem samræmist hugmynda-fræðinni um sjálfstætt líf. Starfið bíður upp á mikinn sveigjanleika og fjölbreytni og gefur viðkomandi talsvert tækifæri til að móta það eftir eigin höfði. Það felst þó fyrst og fremst í því í að aðstoða mig í daglegu lífi og halda skipulagi á aðstoðinni í kringum mig, s.s. varðandi starfs-mannamál og samskipti við opinberar stofnanir. Umsóknir, ásamt ferilskrá og upplýsingum um meðmælendur, berist á netfangið jennyaxels@mac.com, sími 565-0945, 820-9100.

Þriðjudagur 10. janúar 2012

Breyting á staðsetningu námskeiðs.

Athugið.

Fræðslufundurinn sem verður haldinn á austurlandi 18. janúar n.k. hefur verið færður frá Reyðarfirði til Egilsstaða.

Nánari upplýsingar fást hjá Fræðslusetrinu Starfsmennt í síma 550 0060.

Fimmtudagur 5. janúar 2012

Námskeið í janúar

Þjónusta við fatlað fólk á heimilum sínum.

Markmið

Að þátttakendur: -þekki og hafi skilning á framkvæmd þjónustu við fatlað fólk á heimilum sínum, s.s. á sambýlum, þjónustukjörnum og við notendastýrða persónulega aðstoð.

-þekki stefnumótun stjórnvalda og alþjóðlegra samtaka í þjónustu við fatlað fólk.

-þekki hugmyndafræði um sjálfstætt líf.

-þekki verklag og kosti við val á stuðningi við fatlað fólk á heimilum sínum.

Námslýsing

Fjallað er um mismunandi kosti sem fötluðu fólki stendur til boða við val á stuðningsúrræðum á heimilum þess. Kynntar eru helstu stefnur og straumar í mannréttindum á Íslandi og á alþjóða-vettvangi. Jafnframt er fjallað sérstaklega um stuðning sem styrkir getu fatlaðs fólks til þess að taka ákvarðanir um eigið líf. Sérstaklega er fjallað um einstaklingsbundin stuðning, sjálfs-ákvörðunarrétt og trúnað við framkvæmd þjónustunnar. Fjallað er um samskipti starfsmanna og heimilisfólks við umönnun, aðstoð og þjálfun og heimilisbrag þar sem virðing fyrir einkalífi fólks er í öndvegi. Loks verður fjallað um ýmis ágreiningsefni sem upp hafa komið á síðustu árum um framkvæmd þjónustu við fatlað fólk.

Umsjón með námskeiðinu hefur Þór G. Þórarinsson sérfræðingur á skrifstofu velferðarþjónustu- Velferðarráðuneytið.

Námskeiðið verður haldið tvisvar í Reykjavík hjá Framvegis, Skeifunni 11 b, það fyrra 17. jan. kl. 17-20 og seinna námskeiðið er 18. jan. kl. 17-20.

Fjarfundur:

17. jan. Selfoss, Húsavík, Ísafjörð og Sauðárkrók.

18. jan. Reykjanesbær, Borgarnes, Reyðarfjörð, Höfn í Hornafirði og Akureyri.