Félag Íslenskra Félagsliða

Þann 28. okt. lagði Félag íslenskra félagsliða inn til mennta- og menningarmálaráðuneytisins  mótmæli gegn niðurskurðaráformum ríkisstjórnarinnar á síðdegis- og dreifnámi Borgarholtsskóla.

„Félag íslenskra félagsliða mótmælir harðlega þeim áformum stjórnvalda sem fram koma í fjárlagafrumvarpi að skerða sídegis- og dreifnám í Borgarholtsskóla um helming. Telur félagið að hér sé um vanhugsaða aðgerð að ræða sem jafnvel geti stefnt félagsliðanámi í hættu.  Skorar félagið því á stjórnvöld að endurskoða þessi áform.

Í ljósi þeirra efnahagslegu og félagslegu hremminga sem nú ganga yfir íslenskt samfélag hefur krafan orðið háværari og þörfin fyrir fullorðinsfræðslu og starfsmenntun meiri.  Með starfrækslu á fjölbreyttri framkvæmd félagsliðanámsins s.s. dag-, síðdegis-, og dreifnáms er Borgarholtsskóli í raun leitast við að koma til móts við þessi sjónarmið.  Í þessu sambandi má nefna  að námskostir þessir hafa ekki síst verðið nýttir af konum víðsvegar af landinu og á öllum aldri, sem af ýmsum ástæðum hafa orðið að hverfa frá námi á árum áður án þess að ljúka námi til starfsréttinda.  Með eflingu eflingu þessa náms  væri því verið að koma til móts við þarfir hóps á vinnumarkaði sem hefur átt verulega undir högg að sækja og er í verri stöðu en áður í þeim þrengingum sem nú ganga yfir samfélagið.  

Efling á dreifnáminu og þeim menntunar- og námsúrræðum sem það býður upp á, væri því í samræmi við stjórnarsáttmála núverandi ríkisstjórnar varðandi aðgerðir til að sporna gegn atvinnuleysi og alvarlegum félagslegum afleiðingum þess.  

Tiltekið er í stjórnarsáttmálanum sérstaklega að tryggja þurfi öfluga fullorðinsfræðslu og gefa fólki tækifæri til að nýta hæfileika sína, þekkingu og metnað og að virkja vinnufúsar hendur með menntun.  Í þessu sambandi skuli ekki síst horfa til stöðu kynjanna og mismunandi áhrifum á byggðir landsins.  Sérstök áhersla er lögð á að stuðla að endurmenntun atvinnuleitenda.  Kemur þetta og fram í stöðugleikasáttmála ríkisstjórnarinnar og aðilavinnumarkaðarins sl. sumar og fyrri yfirlýsingar rikisstjórnar um sama mál.  Er jafnvel að finna í yfirlýsingum ríkisstjórnarinnar fyrirheit um aukin peningaframlög til fullorðinsfræðslu.

Félag íslenskra félagsliða skorar á stjórnvöld að efla og styrkja síðdegis- og dreifnámi í BHS.  Gera verður skýran greinarmun á hefðbundinni þessa námskosta sem eru í boði í Borgarholtsskóla.  Þeir námskostir sem Borgarholtsskóli býður upp á í dreifnámi  og síðdegisnámi eru lítt eða ekki í boði annars staðar, og því ekki hægt að stunda annars staðar eða með öðrum hætti.  Í engu er vikið frá framsettum námsmarkmiðum skv. námskrá og í kennslu eru bein samskipti nemenda og kennara nálægt því þau sömu og í dagskólakennslu.“